Guðjón Magnús Ólafsson var fæddur árið 1888 og voru foreldrar hans Ólafur Magnússon á Þórustöðum í Bitru og seinni kona hans Elísabet Einarsdóttir. Guðjón ólst upp á Þórustöðum og gerðist síðan bóndi þar eftir föður sinn, en einnig bjó á Þórustöðum Einar bróðir hans. Margrét Jóhanna Gísladóttir var frá Bakka í Geiradal, dóttir Gísla Gunnlaugssonar og Kristjönu Jónsdóttur. Hún var fædd árið 1879. Ung að árum fór Margrét í fóstur að Mýrartungu í Reykhólasveit til þeirra Páls Ingimundarsonar og Ingunnar Bjarnadóttur, en þau voru foreldrar hins þjóðkunna skálds Gests Pálssonar. Um fermingu fór Margrét í vist og var þá lengstum í Gautsdal, þar sem hún síðar á ævinni átti eftir að eiga heima, en einnig var hún um tveggja ára skeið í Ólafsdal hjá þeim þekktu hjónum Torfa Bjarnasyni og Guðlaugu konu hans. Árið 1907 flutti Margrét að Þórustöðum til systur sinnar Ingunnar og manns hennar Einars Ólafssonar, þess sem að ofan er getið. 

Fyrir framan gamla bæinn á Þórustöðum. Guðjón, Margrét, Ólafía,
Gísli, Jónína, Bjarni og Jón.

Á Þórustöðum tókust kynni Guðjóns og Margrétar og gengu þau í hjónaband árið 1910 og hófu búskap ári síðar þegar Guðjón tók við búi af föður sínum. Guðjón og Margrét bjuggu á Þórustöðum í 28 ár og þar áttu þau börn sín og þar ólust börn þeirra upp. Þau urðu fimm talsins. Elst barnanna var Nonna og síðan kom Lóa. Bræðurnir voru yngri, þeir Gilli og Bjarni, og sá yngsti var Nonni, en hann er nú einn eftirlifandi systkina sinna. Ljóst má vera að á Þórustöðum eigum við ættingjarnir sameiginlegan uppruna og þess vegna hljótum við að kenna okkur við þann stað að einhverju eða talsverðu leyti, enda er tilgangur þess að við hittumst á ættarmótum okkar meðal annars sá að styrkja vitundina um þennan uppruna okkar.

Eins og sjá má, þá voru bræðurnir á Þórustöðum, þeir Einar og Guðjón, giftir systrunum ættuðum úr Geiradal, þeim Ingunni og Margréti. Skyldleiki barna þeirra Guðjóns og Margrétar við börn þeirra Einars og Ingunnar var því mun meiri en gerist um systkinabörn almennt, því hér var hann í báðar ættir. Elst barna Einars og Ingunnar var Ólafur á Þórustöðum og býr nú Kjartan sonur hans á Sandhólum, nýbýli sem hann byggði frá Þórustöðum, en Óla Friðmey dóttir Kjartans endurreisti bú á Þórustöðum þar sem hún býr nú.

Á Þórustöðum bjuggu Guðjón og Margrét til ársins 1939, en þá hættu þau búskap og fluttu til Lóu dóttur sinnar og Inga að Gautsdal, en þar hafði Margrét dvalið ung eins og áður segir. Með Lóu og Inga fluttust Guðjón og Margrét svo til Akraness árið 1959 þar sem þau áttu heima til æviloka, lengstum á Brekkubraut 17. Afa- og ömmubörn þeirra muna flest hver vel eftir afa og ömmu í Gautsdal og hve gott var að koma þar til þeirra. Og öll muna þau mjög vel eftir afa og ömmu á Brekkubrautinni þar sem þau áttu síðustu æviárin sín, afi var þá gjarnan hressilegur og spjallaði um það sem helst var að gerast eða gluggaði í bók og amma var blíð og ástúðleg við barnabörnin sín þar sem hún sat með prjónana sína eða var að spinna á rokkinn sinn. Bæði voru þau Guðjón og Margrét vel ern fram undir síðustu æviár sín, en Margrét lést árið 1966 á 88. aldursári og Guðjón fjórum árum síðar tæplega 82 ára að aldri.

Afkomendur Guðjóns og Margrétar eru alls 80 og með mökum er fjöldinn samtals 115 samkvæmt niðjatalinu eftir upplýsingum frá 2002.